24-iyul kuni xorijiy davlatlar va hukumatlar rahbarlari O‘zbekiston Prezidenti Shavkat Mirziyoyevni tug‘ilgan kuni bilan tabriklashda davom etmoqda. Tabrik matnlari “Daryo”ga O‘zA tomonidan taqdim etildi.
Xitoy Xalq Respublikasi raisi Si Szinpin tabrigida bunday deyilgan: “Sizga tug‘ilgan kuningiz munosabati bilan o‘zimning samimiy tabriklarim va ezgu tilaklarimni bildirish menga katta mamnuniyat bag‘ishlaydi”.
“Xitoy va O‘zbekiston munosabatlarini rivojlantirishga muhim ahamiyat qarataman, mamlakatlarimiz va xalqlarimiz farovonligi yo‘lida Xitoy bilan O‘zbekiston o‘rtasidagi har tomonlama strategik sheriklikni birgalikda rivojlantirish va mustahkamlash maqsadida Siz bilan yaqin hamkorlikni davom ettirishga tayyorman”, — ta’kidladi Xitoy rahbari.
Turkmaniston prezidenti Gurbanguli Berdimuhamedov telefon orqali muloqotda Shavkat Mirziyoyevni yubileyi bilan samimiy muborakbod etib, ezgu tilaklar izhor etdi, 2017-yilning birinchi yarmi qardosh mamlakatlar va xalqlar o‘rtasidagi aloqalarni yanada mustahkamlash va rivojlantirish borasida voqealarga boy va samarali bo‘lganini ta’kidladi.
Ozarbayjon prezidenti Ilhom Aliyevning tabrigida bunday deyilgan: “Sizni muhim sana — 60 yillik yubileyingiz bilan samimiy muborakbod etaman va o‘zimning ezgu tilaklarimni yo‘llayman”.
“Ozarbayjon va O‘zbekiston o‘rtasidagi hamkorlik va do‘stlik ma’naviy qadriyatlari mushtarak ikki qardosh xalqning xohish-irodasiga asoslangan. Bugun davlatlarimiz o‘rtasida mustahkam asosda yo‘lga qo‘yilgan munosabatlar alohida ahamiyatga ega”, — ta’kidladi Ozarbayjon rahbari.
Belarus prezidenti Aleksandr Lukashenko ham o‘zbekistonlik hamkasbiga iliq tabrik so‘zlarini yo‘lladi:
“Sizni Belarusda fuqarolari har tomonlama qo‘llab-quvvatlaydigan, jonajon mamlakati farovonligini ta’minlash, uning iqtisodiy qudrati, xalqaro maydondagi obro‘sini, jamiyatda tinchlik va totuvlikni mustahkamlash uchun kuch va imkoniyatlarini ayamaydigan tajribali va dono davlat arbobi sifatida biladi”.
Belarus rahbari “ikki tomonlama muloqotni faollashtirish Belarus va O‘zbekiston manfaatlariga mos kelishi va xalqlarimiz o‘rtasidagi an’anaviy mustahkam do‘stlik va o‘zaro anglashuv asosida serqirra sheriklikni yanada chuqurlashtirishga xizmat qilishi”ga ishonch bildirdi.
Ukraina prezidenti Pyotr Poroshenko o‘z tabrigida “Sizning rahbarligingizda O‘zbekiston Respublikasini yanada rivojlantirish bo‘yicha harakatlar strategiyasi doirasida muvaffaqiyatli amalga oshirilayotgan islohotlar mustaqil O‘zbekiston taraqqiyotida yangi bosqich bo‘ladi. Davlatni izchillik bilan modernizatsiya qilish mamlakatingizning xalqaro obro‘sini yanada mustahkamlash va mehnatkash xalqingiz farovonligini oshirishga xizmat qilmoqda”, deb ta’kidlagan.
Bolgariya prezidenti Ramen Radev o‘z tabrigida O‘zbekiston Respublikasi Prezidentini 60 yillik yubileyi bilan samimiy tabriklab, ezgu tilaklarini yo‘lladi:
“Qulay fursatdan foydalanib, mamlakatlarimiz o‘rtasidagi hamkorlik va an’anaviy do‘stlik munosabatlari umumiy sa’y-harakatlar bilan xalqlarimiz farovonligi uchun yanada rivojlanishi va boyishiga ishonaman”.
Rossiya hukumati raisi Dmitriy Medvedev O‘zbekiston rahbarini 60 yoshi bilan Rossiya hukumati va shaxsan o‘z nomidan samimiy tabrikladi:
“O‘zbekistonda Sizning rahbarligingizda milliy iqtisodiyot salohiyatini to‘liq ochib beradigan va yetakchi xalqaro sheriklar bilan o‘zaro savdo-iqtisodiy va investitsion hamkorlikni sifat jihatidan yangi darajaga olib chiqadigan keng ko‘lamli davlat dasturlari hayotga tatbiq etilmoqda”.
Ilgariroq Shavkat Mirziyoyevni Vladimir Putin, Nursulton Nazarboyev, Emomali Rahmon va Almazbek Atambayev tabriklagan edi.
Izoh (0)