Ўзбекистон Президенти Шавкат Мирзиёевнинг «Аҳолини дори воситалари ва тиббиёт буюмлари билан таъминлаш тизимини такомиллаштириш бўйича қўшимча чора-тадбирлар тўғрисида»ги қарори билан дори воситалари ва тиббиёт буюмларини харид қилиш, истеъмолчиларга товар чеки бериш жараёнлари янада такомиллаштирилди. Бу ҳақда Соғлиқни сақлаш вазирлигининг Ахборот хизмати хабар берди.
«Айрим дорихоналарда ускуна носозлиги ёки бошқа бирор сабаб туфайли товар чеки берилмаслиги ҳолатлари қайд этилаётган эди. Бу эса дори воситаларининг чекланган нархларда сотилиши ва сифати устидан истеъмолчи назоратининг сусайишига олиб келаётганди. Давлатимиз раҳбарининг мазкур қарорида дори воситалари ва тиббиёт буюмларини чакана сотишда фойдаланиладиган товар чеклари китоби шаклини тасдиқлаш вазифаси белгиланди. Ушбу китоб қатъий ҳисоби юритиладиган бланк ҳисобланади ва ундан товар чекларини бериш бўйича асбоб-ускуналар мавжуд бўлмаган ёки носоз бўлган ёхуд электр энергияси вақтинча ўчирилган ҳоллардагина фойдаланилади. Ушбу бланкда ҳам товар чекида қайд этилувчи маълумотлар тўлиқ акс этади», — дейди Соғлиқни сақлаш вазирлиги Дори воситалари ва тиббий техника сифатини назорат қилиш бош бошқармаси бўлим бошлиғи Муҳаббат Ибрагимова. Яъни унда:
- Дори воситаси ёки тиббиёт буюмининг номи;
- Идентификация маълумотлари (номи, дозаси, қадоқлаш, миқдори);
- Уларни берувчи шахсга оид маълумотлар;
- Бериш санаси;
- Нархи.
Изоҳ (0)