«Тошкент—Самарқанд» тезюрар темир йўл йўналиши атрофидаги аҳоли пунктларининг меъморий кўриниши жорий йил охиригача яхшиланади. Бу Ўзбекистон Вазирлар Маҳкамасининг 13 июлдаги қарорида белгиланган, деб ёзмоқда «Газета.uz».
Ободонлаштириш ишлари Тошкент шаҳри, Тошкент, Сирдарё, Жиззах ва Самарқанд вилоятлари ҳудудида олиб борилади.
Қарорга асосан, 1 октябргача 3078 та аҳоли яшаш уйи қайта ва капитал таъмирланади. Уйларнинг томи алмаштирилади, фасадлари таъмирланади, панжаралар қурилади. Шу мақсадда 33,7 миллиард сўм ажратилади.
Бундан ташқари, темир йўлнинг атрофида типик лойиҳа асосида 629 та арзон уй қурилади. Уларнинг умумий қиймати 79,1 миллиард сўмни ташкил қилади.
Янги уйларга 18,9 километр газ, 22 километр электроэнергия, 18,9 километр сув таъминоти тармоғи ўтказилади. 21,7 километрли автомобиль йўли қуриш режалаштирилган. Бу мақсадда қарийб 30 миллиард сўм ажратилади.
Автомобиль йўллари бўйича давлат қўмитасига 1 октябргача «Тошкент—Самарқанд» темир йўл участкаси яқинидаги кўприклар ва йўл ўтказгичларини таъмирлаш, шунингдек, бузилган йўл белгиларини алмаштириш юклатилган.
Изоҳ (0)