20 июль, пайшанба куни «Ўзбекистон» телерадиоканали орқали «Биз учун муҳим» кўрсатувининг навбатдаги сони тўғридан-тўғри эфир орқали томошабинларга узатилди.
Бу сафарги мавзу Ўзбекистон Президенти Шавкат Мирзиёевнинг 17 июлдаги «Аҳолини дори воситалари ва тиббиёт буюмлари билан таъминлаш тизимини такомиллаштириш бўйича қўшимча чора-тадбирлар тўғрисида»ги қарорига бағишланди. Унда асосий муаммо сифатида хориждан кириб келадиган дори воситаларининг камайиб кетганлиги, мавжудларининг ҳам нархи жуда қиммат эканлиги, шифокорларнинг дорихона ходимлари билан ўзаро келишиб олган ҳолда фаолият юритаётганликлари ҳақида сўз борди.
Кўрсатувда эксперт сифатида Соғлиқни сақлаш вазирининг биринчи ўринбосари Баҳодир Юсупалиев, «Дори-дармон» акциядорлик компанияси тижорат директори Абдуғани Комилов, Давлат божхона қўмитаси, Марказий банк ва бошқа давлат идора вакиллари, хусусий дорихона ва ОАВ вакиллари иштирок этди.
«Президент қарорида 343 турдаги дориларнинг нархлари ва уларнинг устига қўйиладиган фоизлари белгилаб берилган. Шу дориларнинг 116 таси маҳаллий корхоналар томонидан ишлаб чиқарилади. Қолгани эса хориждан, жумладан, МДҲ давлатларидан кириб келади. Тўғри, 1 январдан бошлаб кучга кирган қарор баъзи хорижий дори воситалари тақчиллигини юзага келтирмоқда, бироқ бу вақтинча. Бу муаммоларни ҳал этиш борасида самарали ишлар қилиниши режалаштирилмоқда», — деди Баҳодир Юсупалиев.
«Бизда шифокорлар айнан ёзиб берган дориларнинг ўзи бўлмаса ҳам, унинг ўрнини босувчи бошқа воситалар мавжуд. Шифокорлар беморларга рецепт ёзиб бераётганида шуни ҳам эътиборга олиш лозим», — дейди Абдуғани Комилов.
Кўрсатувда дорихоналарда хориждан кириб келаётган дориларнинг аксарияти мавжуд эмаслиги ҳақида видеороликлар намойиш қилинди. Ижтимоий тармоқ фойдаланувчиларининг ҳам дори муаммосига боғлиқ саволлари ўқиб эшиттирилди, жумладан:
«Бизнинг маҳаллада дорихона йўқ. Дориларни фақатгина дам олиш кунлари бозордан сотиб оламиз. У ерда дори сотувчилар ўзларининг халталарида олиб келган дориларини анча қиммат нархларда пуллайди. Бунга қандай ечим топишимиз керак?», — дея савол йўллади Паяриқ туманининг «Нукус» маҳалласида истиқомат қилувчи фуқаро.
Соғлиқни сақлаш вазирининг биринчи ўринбосари бу масала юзасидан тез орада чора кўришга ваъда берди.
Шунингдек, шифокорларнинг дорихона ходимлари билан тил бириктириб олиши, улар беморларни ўзларига таниш бўлган дорихоналарга юбориши ҳақида ҳам савол бўлиб ўтди.
«Афсуски, шундай ҳолатлар ҳам учраб туради. Бунда шифокор дорихоначидан унга мижоз юборгани учун қанчадир миқдорда пул олади албатта. Бу ёғи энди уларнинг виждонига боғлиқ. Дори сотиш — бу бизнес эмас, у аҳолининг манфаатини, эҳтиёжини қондириш учун хизмат қилиши керак», — деди Баҳодир Юсупалиев.
Изоҳ (0)