Давлат божхона қўмитаси вакили: Божхона тўловлари дорилар нархининг ошишига юз фоиз таъсир қилмайди

20 июль, пайшанба куни «Ўзбекистон» телерадиоканали орқали «Биз учун муҳим» кўрсатувининг навбатдаги сони тўғридан-тўғри эфир орқали томошабинларга узатилди.

Кўрсатувда эксперт сифатида Соғлиқни сақлаш вазирининг биринчи ўринбосари Баҳодир Юсупалиев, «Дори-дармон» акциядорлик компанияси тижорат директори Абдуғани Комилов, Давлат божхона қўмитаси, Марказий банк ва бошқа давлат идора вакиллари, хусусий дорихона ҳамда ОАВ вакиллари иштирок этди.

Томошабинлар томонидан нега кўплаб дорихоналар 24 соат ишламайди, ишлаганларида ҳам дори воситалари нархлари кундузгига нисбатан анча қиммат деган саволга «Дори-дармон» акциядорлик компанияси тижорат директори жавоб берди:

«Тошкент шаҳрида бизнинг 70 дан ортиқ дорихоналаримиз мавжуд бўлса, шуларнинг 10 га яқини кун-у тун навбатчилик қилади. Уларда дориларнинг нархлари кундузгига нисбатан ўзгармайди», — деди Абдуғани Комилов.

Кўрсатув давомида хориждан келадиган дорилар валюта олишдаги муаммолар сабаб юзага келмоқдами деган савол ҳам берилди.

«Биз ҳар бир аҳолининг эҳтиёжи учун валюта ажрата олмаймиз. Бунинг имкони йўқ. Бироқ Марказий банк томонидан ҳар ойда хориждан сотиб олинадиган дори воситалари учун 10—15 миллион доллар ажратилмоқда. «Ўзфармсаноат»нинг хориждан дори ишлаб чиқаришда керак бўладиган технологиялари ва хом ашёлари учун эса 10 миллион доллар ажратилмоқда», — деди Марказий банк вакили.

Дори воситаларининг нарх-навосини ошишида божхона тўловларининг ортганлигини таъсири борми, деган саволга Давлат божхона қўмитаси Ахборот хизмати катта инспектори Ҳусан Тангриев жавоб берди:

«Хориждан кириб келадиган дориларда юртимиз томонидан анча имкониятлар яратилган. Хусусан, МДҲ давлатларидан кириб келадиган дори воситалари импорт божи, аксиз солиғи ва қўшимча қиймат солиқларидан озод қилинган. Шундай экан дори нархларини ошишига божхона божлари 100 фоиз таъсир қилмайди», — деди Ҳусан Тангриев.