Германия ҳарбий самолётлари Сурияни айланиб учиш учун энди Туркиядан эмас, Иорданиядан учиб чиқади. Орасига низо тушган НАТО бўйича иттифоқдошларнинг муносабатлари энди қандай бўлиши ҳаммани қизиқтирмоқда, деб ёзади «РИА Новости».
Германия ёқилғи қуювчи самолёти Иорданиядан илк парвозини амалга оширди. Иорданиянинг «Ал-Азрак» авиабазасига тез орада Туркиядан Германиянинг бутун ҳарбий контингенти кўчиб ўтади. Германия самолётлари Туркия ҳудудини июль охиригача тарк этиши керак.
Германия парламентарийларига «Инжирлик» авиабазасидаги немис ҳарбий хизматчилари олдига ташриф буюриш бир неча марта тақиқлангач, Берлин бундай чорага қўл урди. Туркия эса ўзининг рад жавобини Германия Анқарага ўтган йилги давлат тўнтаришига уринишни ташкиллаштиришда гумонланувчиларни топширишни истамаётганлиги билан изоҳлади. Бу икки мамлакат ўртасидаги ёмонлашиб бораётган муносабатларнинг мантиқий давоми бўлди.
Берлин ва Анқара ўртасидаги низонинг қисқача тарихи қуйидагича: дастлаб, ўтган йилнинг июнида бундестаг арман халқи геноцидини тан олди. Бунга жавобан Анқара германиялик парламентарийларга бундесвер аскарлари жойлашган базага ташриф буюришга рухсат бермади. Сўнг Туркияда конституциявий ислоҳот ўтказилиши олдидан Германия туркиялик сиёсатчиларга диаспора олдида нутқ сўзлаш учун мамлакатга киришга рухсат бермади. Анқара «Катта йигирматалик» саммити олдидан асли туркияликлар олдида президент Ражаб Тоййиб Эрдўғон нутқ сўзлаши учун сўров жўнатганида, Берлин рад жавоби берди.
Изоҳ (0)