Germaniya harbiy samolyotlari Suriyani aylanib uchish uchun endi Turkiyadan emas, Iordaniyadan uchib chiqadi. Orasiga nizo tushgan NATO bo‘yicha ittifoqdoshlarning munosabatlari endi qanday bo‘lishi hammani qiziqtirmoqda, deb yozadi “RIA Novosti”.
Germaniya yoqilg‘i quyuvchi samolyoti Iordaniyadan ilk parvozini amalga oshirdi. Iordaniyaning “Al-Azrak” aviabazasiga tez orada Turkiyadan Germaniyaning butun harbiy kontingenti ko‘chib o‘tadi. Germaniya samolyotlari Turkiya hududini iyul oxirigacha tark etishi kerak.
Germaniya parlamentariylariga “Injirlik” aviabazasidagi nemis harbiy xizmatchilari oldiga tashrif buyurish bir necha marta taqiqlangach, Berlin bunday choraga qo‘l urdi. Turkiya esa o‘zining rad javobini Germaniya Anqaraga o‘tgan yilgi davlat to‘ntarishiga urinishni tashkillashtirishda gumonlanuvchilarni topshirishni istamayotganligi bilan izohladi. Bu ikki mamlakat o‘rtasidagi yomonlashib borayotgan munosabatlarning mantiqiy davomi bo‘ldi.
Berlin va Anqara o‘rtasidagi nizoning qisqacha tarixi quyidagicha: dastlab, o‘tgan yilning iyunida bundestag arman xalqi genotsidini tan oldi. Bunga javoban Anqara germaniyalik parlamentariylarga bundesver askarlari joylashgan bazaga tashrif buyurishga ruxsat bermadi. So‘ng Turkiyada konstitutsiyaviy islohot o‘tkazilishi oldidan Germaniya turkiyalik siyosatchilarga diaspora oldida nutq so‘zlash uchun mamlakatga kirishga ruxsat bermadi. Anqara “Katta yigirmatalik” sammiti oldidan asli turkiyaliklar oldida prezident Rajab Toyyib Erdo‘g‘on nutq so‘zlashi uchun so‘rov jo‘natganida, Berlin rad javobi berdi.
Izoh (0)