Passport Index сайтида паспортларнинг актуал рейтинги эълон қилинди, у ушбу паспорт эгалари учун чегараларнинг очиқлиги нуқтаи назаридан тузилган, деб ёзади National Geographic.
Паспорт рейтинги 193 та мамлакат ва 6 та ҳудуд кирадиган БМТ рўйхатига асосланган. Баллар у ёки бу мамлакат фуқароси олдиндан расмийлаштирилмаган визасиз кириши мумкин бўлган ҳар битта давлат учун берилади. Бутунлай визасиз режимлар ҳам, визани учиб келган аэропортдан олиш имконияти ҳам ҳисобга олинади.
Сўнгги йилда вазият умуман олганда сезиларли равишда ўзгармаган: дунёнинг кўпчилик чегаралари очиқ бўлган энг «қудратли» паспортлар соҳиблари Ғарбий Европа ва Шимолий Америка фуқаролари бўлиб қолмоқда; Осиё мамлакатлари орасида Сингапур, Жанубий Корея ва Япония етакчилик қилмоқда.
Яқин Шарқ мамлакатлари фуқаролари учун эса энг кам мамлакатлар чегаралари очиқ. Афғонистонликлар бор-йўғи 22 та мамлакатга визасиз сафар қила олади, Покистонда эса ушбу кўрсаткич 25 тага, Ироқда 26 тага тенг.
Рейтингда энг сезиларли сакрашни Украина амалга оширди: илгари унинг фуқаролари визасиз 85 та мамлакатга бора олган бўлса, Евроиттифоқнинг тарихий қароридан кейин энди уларнинг сони 119 тага етди. Натижада Паспорт рейтингида Украина 48-ўриндан 30-га чиқиб олди. Европага визасиз кириш учун яқинда рухсат олган яна бир мамлакат — Грузия паспорти соҳиблари 104 та мамлакатга визасиз бора олади.
Шунингдек, қатор ҳукуматлараро битимлар натижасида россияликлар энди 108 та мамлакатга визасиз ташриф буюра олади (аввал 98 та эди).
Изоҳ (0)