КХДРда «Хвасон-14» қитъалараро баллистик ракетасининг муваффақиятли синови мамлакатнинг стратегик позициясини тубдан ўзгартирди, деб ёзади «ТАСС». Бу ҳақда, Корея марказий телеграф агентлиги маълум қилишича, халқ республикаси етакчиси Ким Чен Ин айтиб ўтган.
Корея Меҳнат партияси ва КХДР Давлат кенгаши раиси Пхеньяндаги «Мансудэ» съездлар саройида ушбу ракета лойиҳасини амалга оширишда қатнашган олимлар ва технологларни тақдирлаш маросимида сўзга чиқди.
Ким Чен Иннинг сўзларига кўра, КХДРдаги «Хвасон-14» қитъалараро баллистик ракетасининг муваффақиятли синови «мамлакат стратегик позициясини ва дунё сиёсий тузилмасини тубдан ўзгартирган».
«Бу воқеа партия томонидан танланган, иқтисодиётни ривожлантириш ва ядро кучларини мустаҳкамлашни параллел тарзда олиб бориш йўли асосли эканлигини тасдиқлади», — деди республика етакчиси. Ким Чен Ин ишонч билдиришича, мудофаа саноатида банд бўлган олимлар ва технологлар «Бажар ёки жон бер!» шиори остида ҳарбий кафолатларни таъминлашда янги ёрқин муваффақиятларга эришади.
Ракетанинг кўзга кўринган яратувчилари Ким Ир Сен ва Ким Чен Ир орденлари билан тақдирланди, уларга КХДР қаҳрамонлари ёки КХДР меҳнат қаҳрамонлари унвонлари берилди ҳамда «Ўроқ ва болға» олтин медаллари, шунингдек, биринчи даражали Давлат байроғи орденлари топширилди. Яна бир гуруҳ технолог, муҳандис ва ишчиларга бошқа мукофотлар, хусусан, Ким Ир Сен ва Ким Чен Ир тасвирлари туширилган соатлар, шунингдек, ҳозирги давлат раҳбарининг иқтибослари тўпламлари топширилди.
Изоҳ (0)