АҚШ президенти Дональд Трамп Хитой раиси Си Цзиньпин билан 2 июль, якшанба куни бўлиб ўтган телефон орқали мулоқотида Вашингтон Пекин ёрдамига таянмай, ўз кучи билан Шимолий Кореяга босим ўтказишга тайёр эканлигини билдирди. Бу ҳақда «ТАСС» хабар бермоқда.
The New York Times нашрининг суҳбат тафсилотлари билан таниш манбаларига кўра, икки етакчининг мулоқоти «илтифотли, бироқ очиқ ва дангал» руҳда кечган.
«Пекиннинг Шимолий Кореяга босим ўтказишни истамаслигидан ҳафсаласи пир бўлган АҚШ президенти Хитой етакчисига ядро аслаҳасига эга бўлган Пхеньянга босим ўтказиш масаласида мустақил ҳаракат қилишга тайёр эканлигини маълум қилди», — дейилади газетада чоп этилган мақолада.
Шу билан бирга, Оқ уй матбуот хизмати тарқатган баёнотда Трамп Си Цзиньпинга «КХДР ядро ва ракета дастури туғдираётган хавф ортиб бораётгани»ни кўрсатиб ўтгани таъкидланган, холос.
Эслатиб ўтамиз, Шимолий Корея 4 июль, сешанба куни навбатдаги баллистик ракетани учирди.
Изоҳ (0)