БМТнинг иқтисодий ва ижтимоий масалалар бўйича департаменти «Жаҳон аҳолиси истиқболлари» ҳисоботининг янгиланган версиясини эълон қилди. Бундан олдинги рақамларни Ҳиндистон ҳамда Африка аҳолисининг ўсиши ҳисобига қайта кўриб чиқишга тўғри келди, деб хабар берди National Geographic.
Ҳозирда Ҳиндистон ўзининг аҳолиси сони бўйича дунёда иккинчи ўринда: 1,3 миллиард одам. Хитой аҳолиси эса 1,4 миллиардни ташкил этади, бироқ 2024 йилга бориб Ҳиндистон биринчи ўринга чиқиб олиши кутилмоқда. Европа аҳолисининг тез камайиб бориши фонида Африканинг 26 мамлакати аҳолиси 2050 йилга бориб икки баробарга ортади.
БМТ экспертларининг ҳисоб-китобларига кўра 2030 йилга бориб Ер аҳолиси 8,6 миллиардга, 2050 йилда 9,8 миллиардга, аср охирига бориб эса 11,2 миллиардга етади. Аввалги башоратда 2030 йилда аҳоли 8,5 миллиардни, 2050 йилда эса 9,7 миллиардни ташкил этган. Аср ўрталарига бориб Ер аҳолисининг ярми тўққизта мамлакатда жамланган бўлади: Ҳиндистон, Нигерия, Конго демократик республикаси, Покистон, Эфиопия, Танзания бирлашган республикаси, АҚШ, Уганда ҳамда Индонезия.
БМТ ҳисоботида келтирилган яна бир омил бу аҳолининг қариши. Дунёнинг барча минтақаларида умр кўришнинг ўсиши қайд этилган: 2000—2005 йилларда эркакларнинг ўртача умр кўриш ёши 65 йилни, аёлларники 69 йилни ташкил этган бўлса, 2010—2015 йилларда бу кўрсаткич эркакларда 69, аёлларда 73 йилни ташкил этган.
Ер аҳолисининг ортиб бориши ресусрларнинг тез камайишига, экологик муаммолар, сиёсий нотинчликлар, ишсизлик ҳамда қашшоқликнинг кўпайишига олиб келади.
Изоҳ (0)