27 июнь, сешанба куни Венесуэла Олий суди биносига ҳужум уюштирган полиция офицери Оскар Перес президент Николас Мадуронинг истеъфосини талаб қилди. Бу ҳақда у Instagram’даги видеомурожаатида айтиб ўтди, деб ёзади «ТАСС».
Перес эгаллаб олган полиция вертолёти бортидан Олий суд биноси ўққа тутилган ва унга бир нечта граната ташланган эди. Жабрланганлар ҳақида маълумот келиб тушмади.
«Президент Николас Мадуро, биз сенинг вазирлар билан биргаликда зудлик билан истеъфога чиқишингни ва умумий сайловлар ўтказилишини талаб қиламиз», — деди Перес.
Унинг сўзларига кўра, «жиноий ҳукумат»га ҳеч қайси партияга тааллуқли бўлмаган «ҳарбийлар, полициячилар ва фуқаро шахслар», «миллатчилар ва ватанпарварлар» коалицияси қарши чиқади.
Перес таъкидлашича, ушбу гуруҳ вакиллари «ҳокимиятни демократик халққа қайтариш ва конституциявий тартибни қайта тиклаш» учун ерда ва ҳавода операция ўтказади.
Изоҳ (0)