Евросиё Медиа Форуми — 2017. Тожикистонлик журналист Аваз Йўлдошев: тожикистонлик томошабинлар ўзбек санъаткорларини тик туриб олқишлаб, кўзда ёш билан кутиб олди
Тожикистоннинг Asia-Plus нашри бош муҳаррири Аваз Йўлдошев Остонадаги Евросиё Медиа Форуми доирасида «Дарё» вакилига интервью берди. У Тожикистон халқи Ўзбекистон билан алоқаларнинг чуқурлашувини ижобий тарзда қабул қилаётганини таъкидлади.
Унинг айтишича, сўнгги 6—7 ой ичида савдо ва иқтисодий ҳамкорлик бўйича Ўзбекистон—Тожикистон ҳукуматлараро комиссиясининг иккита йиғилиши бўлиб ўтди. Шунингдек, маданият соҳасидаги ҳамкорликда ҳам яхши натижаларга эришилди. «Ўзбекистон маданияти вакиллари Тожикистон саҳнасида чиқиш қилганида тожикистонлик томошабинлар уларни тик туриб, кўзида ёш билан олқишлади», — деди Йўлдошев.
«Тожикистонда биринчи марта Ўзбекистонда ишлаб чиқарилган саноат маҳсулотлари кўргазмаси бўлиб ўтди, у орқали биз қўшни мамлакатда енгил автомобиллардан тортиб, юк машиналаригача, совитгичлардан тортиб, кондиционерларгача бўлган маҳсулотларини ишлаб чиқаришидан хабар топдик, — деди у. — Шу пайтгача Саудия Арабистони, Япония, Германиядан баланд нархларда сотиб олган нарсаларни бизнинг ён қўшнимиз ҳам улардан қолишмайдиган сифатда ишлаб чиқараётганидан бехабар бўлган эканмиз».
Журналист бош вазир ўринбосари Улуғбек Рўзиқулов раҳбарлигидаги Ўзбекистон делегацияси яқинда Душанбега уюштирилган сафари чоғида ўзбек автомобиллари сотиладиган савдо маркази қурилаётган жойга ташриф буюрганини, бу икки томонлама муносабатлардаги улкан қадам эканлигини таъкидлади. «Умуман, ўша ташриф савдо-иқтисодий алоқаларни яхшилашга қаратилган эди, унда икки томон вакиллари ҳам мамлакатлар ўртасида визасиз режим ўрнатишни ёқлаб гапирди ва бу масала муҳокама қилиниши қайд этилди», — деди Asia-Plus бош муҳаррири.
Гап орасида тожикистонлик журналист асли Ўзбекистонда туғилганини, ўзбек тилини ҳам яхши билишини айтиб ўтди. У яқинда Ўзбекистон Биринчи Президенти Ислом Каримов қабрини зиёрат қилганини ҳам қўшиб қўйди. «Тожик халқи икки мамлакат ўртасидаги алоқалар юқори даражада янада ривожланишига умид қилиб қолади», — деди у.
