Yevrosiyo Media Forumi — 2017. Tojikistonlik jurnalist Avaz Yo‘ldoshev: tojikistonlik tomoshabinlar o‘zbek san’atkorlarini tik turib olqishlab, ko‘zda yosh bilan kutib oldi

Tojikistonning Asia-Plus nashri bosh muharriri Avaz Yo‘ldoshev Ostonadagi Yevrosiyo Media Forumi doirasida “Daryo” vakiliga intervyu berdi.  U Tojikiston xalqi O‘zbekiston bilan aloqalarning chuqurlashuvini ijobiy tarzda qabul qilayotganini ta’kidladi.

Uning aytishicha, so‘nggi 6—7 oy ichida savdo va iqtisodiy hamkorlik bo‘yicha O‘zbekiston—Tojikiston hukumatlararo komissiyasining ikkita yig‘ilishi bo‘lib o‘tdi. Shuningdek, madaniyat sohasidagi hamkorlikda ham yaxshi natijalarga erishildi. “O‘zbekiston madaniyati vakillari Tojikiston sahnasida chiqish qilganida tojikistonlik tomoshabinlar ularni tik turib, ko‘zida yosh bilan olqishladi”, — dedi Yo‘ldoshev.

“Tojikistonda birinchi marta O‘zbekistonda ishlab chiqarilgan sanoat mahsulotlari ko‘rgazmasi bo‘lib o‘tdi, u orqali biz qo‘shni mamlakatda yengil avtomobillardan tortib, yuk mashinalarigacha, sovitgichlardan tortib, konditsionerlargacha bo‘lgan mahsulotlarini ishlab chiqarishidan xabar topdik, — dedi u. — Shu paytgacha Saudiya Arabistoni, Yaponiya, Germaniyadan baland narxlarda sotib olgan narsalarni bizning yon qo‘shnimiz ham ulardan qolishmaydigan sifatda ishlab chiqarayotganidan bexabar bo‘lgan ekanmiz”.

Jurnalist bosh vazir o‘rinbosari Ulug‘bek Ro‘ziqulov rahbarligidagi O‘zbekiston delegatsiyasi yaqinda Dushanbega uyushtirilgan safari chog‘ida o‘zbek avtomobillari sotiladigan savdo markazi qurilayotgan joyga tashrif buyurganini, bu ikki tomonlama munosabatlardagi ulkan qadam ekanligini ta’kidladi. “Umuman, o‘sha tashrif savdo-iqtisodiy aloqalarni yaxshilashga qaratilgan edi, unda ikki tomon vakillari ham mamlakatlar o‘rtasida vizasiz rejim o‘rnatishni yoqlab gapirdi va bu masala muhokama qilinishi qayd etildi”, — dedi Asia-Plus bosh muharriri.

Gap orasida tojikistonlik jurnalist asli O‘zbekistonda tug‘ilganini, o‘zbek tilini ham yaxshi bilishini aytib o‘tdi. U yaqinda O‘zbekiston Birinchi Prezidenti Islom Karimov qabrini ziyorat qilganini ham qo‘shib qo‘ydi. “Tojik xalqi ikki mamlakat o‘rtasidagi aloqalar yuqori darajada yanada rivojlanishiga umid qilib qoladi”, — dedi u.