АҚШ Қуролли кучларининг Европадаги қўмондонлиги ўзининг сайтида Россиянинг Су-27 қирувчиси RC-135U разведкачи самолётига яқинлашгани тасвирланган суратларни эълон қилди, деб хабар берди «Газета.ru».
Идоранинг маълумотларига кўра, воқеа 19 июнда Болтиқ денгизи устидаги халқаро ҳаво ҳудудида содир бўлган.
«Яқинлашишнинг катта тезлиги ва тўхтатиб қолишда ҳаво кемасининг ёмон бошқарилганлиги сабабли яқинлашиш хавфсиз дея топилмаган», — дейилади хабарда.
Fox News манбаларининг айтишича, Россия самолёти Америка самолётига бир ярим метр масофага қадар яқин келган. Шу билан бирга Су-27 самолёти ракеталар билан қуролланган бўлган.
Америкалик расмийлардан бири Россия қирувчисининг ушбу ҳаракатларини «провокацион« дея ҳисоблади. Унинг айтишича, Су-27 «тартибсиз учган».
Россия Мудофаа вазирлиги «10 дақиқа ўтмасдан ушбу ҳудудга яна бир RC-135 самолёти киргани ва у ҳам Россиянинг Су-27 қирувчиси томонидан тўхтатиб қолингани»ни маълум қилди.
Аввалроқ, НАТОнинг F-16 қирувчи самолёти бортида Россия мудофаа вазири Сергей Шойгу бўлган самолётга яқинлашишга уриниб кўргани ҳақида хабар берилган эди. Ўшанда Су-27 қирувчиси F-16 га яқинлашган. Бу ҳолат бир кунда икки марта юз берган.
Изоҳ (0)