Гуллар сўлишининг битта оддий сабаби бор: уларга сув етишмайди. Гулдастани бор-йўғи бир неча оддий ҳаракатлар билан жонлантириш мумкин. Албатта, уни бир умр янги ҳолида сақлай олмайсиз, лекин ҳар ҳолда гуллар умрини бир неча кунга узайтирасиз.
Фото: «Azaliagroup.ru»
Бандларини кесинг
Кўпинча муаммо шунда бўладики, бандларининг пастки чеккалари қурийди ва сувни ўзига бошқа сингдирмай қўяди. Ўткир қайчи ёки пичоқ олинг ва иложи борича бандининг катта қисми сув ичиши учун уни қийшиқ қилиб кесинг. Сув кўпроқ бориши учун банди устига узунасига унчалик катта бўлмаган (2–4 см) кертик қилинг.
Гулларни илиқ сув ичига қўйинг
Илиқ сув бандлар бўйлаб тезроқ ҳаракатланади ва ўсимликлардан ўтган томирларни тозалайди, шу туфайли гулларнинг сув ичиши осон бўлади. Албатта, ваза ичига қайноқ сув қуйиш керак эмас, сув илиқ бўлиши учун бир вақтнинг ўзида ҳам иссиқ ва ҳам совуқ кранларни очинг.
Лолалар илиқ сувни кўтара олмаслигига эътибор қилинг.
Кутинг
Жуда тез самара беришига умид қилманг. Гулдастангиз «тирилиши» учун камида бир неча соат вақт талаб қилинади.
Амални такрорланг
Гулларнинг бандини ҳар икки кунда бир сантиметрдан кесиб туринг. Ҳар куни ёки ҳеч бўлмаса кун ора вазадаги сувни алмаштиринг.
Агар сизнинг деразаларингиз қуёш томонда жойлашган бўлса гулдастани дераза токчасида қолдирманг: гуллар иссиқда тез сўлиб қолади. Сиз уйда бўлмаган пайтларда яхшиси вазани қоронғи ва салқин жойга қўйинг.
Изоҳ (0)