Полиз зараркунандаларидан қандай сақланиш керак? 3 та синалган усул
Ҳосилга зарар етмаслиги учун кучли таъсир қилувчи заҳарли-кимёвий воситаларни ғамлаш шарт эмас — ўзингиз тайёрлаган воситалардан ҳам фойдалансангиз бўлади.
Фото: «Glav-dacha.ru»
Ёғли спрей
Бу восита ширалар, капалар ва турли хил қўнғизларга қарши яхши самара беради. Эритмани тайёрлаш учун сизга бир пиёла ўсимлик ёғи ва бир ош қошиқ суюқ совун керак бўлади. Масаллиқларни бутилкага солинг ва яхшилаб силкитинг. Қўллашдан олдин 2 чой қошиқ аралашмани 1 литр сувда эритинг, эритмани пуркагичли идишга қуйинг, силкитинг ва ўсимликларнинг зарарланган баргларига сепинг. Зараркунандалар устига тушган ёғ нафас олишга тўсқинлик қиладиган қобиқ ҳосил қилади ва бу уларнинг ҳалокатига олиб келади.
Совунли спрей
Совунли спрей ҳам ширалар, капалар ва ҳар хил қўнғизлар билан курашувчи яхши восита ҳисобланади. 1 ½ чой қошиқ суюқ совунни 1 литр сувда эритинг, воситани ўсимликларнинг зарарланган қисмларига сепинг. Совунли эритманинг таъсир қилиш тартиби ҳам ёғли эритманикига ўхшайди, шунинг учун улардан зарур ҳоллардагина фойдаланиш керак. Уни кечқурун ёки эрталаб қуёш чиқмасдан туриб сепиш тавсия қилинади.
Саримсоқли спрей
Саримсоқ ҳиди капалак қуртларини, шунингдек баъзи бошқа зараркунандаларни ҳам қочиради. Кечқурун 2 бош саримсоқни эзиб майдаланг ва суюқ бўтқа ҳолатига келиши учун бироз сув қўшинг. Саримсоқни эрталабгача тиндириб қўйинг, кейин эса уни бир литрлик банкага ўтказинг, ½ пиёла ўсимлик ёғи, 1 чой қошиқ суюқ совун қўшинг, тўлдириб сув солинг ва аралаштиринг. Ишлатишдан олдин 1 пиёла воситани 1 литр сувга солиб аралаштиринг ва зарарланган ўсимликларга сепинг.
Зарaркунандаларга қарши курашишнинг бошқа усуллари
Бу спрейлардан ташқари зараркунандаларнинг кўпгина бошқа табиий душманлари ҳам бор: асаларилар, арилар, хонқизи, тиллақўнғизлар, бешиктерватлар ва ўргимчаклар. Агар уларни ўз томонингизга жалб қилсангиз, масалани анча енгиллаштирган бўласиз. Бунинг учун уларни чақирадиган ўсимликлар экиш мумкин: райҳон, календула, мойчечак, дасторбош, ялпиз, лаванда, петрушка ва чангга бой бўлган гуллар.
Изоҳ (0)