Россия фуқароси деб тахмин этилаётган 30 ёшли Анастасия Шакурова ва унинг яқин ўртоғи, 31 ёшли неаполлик Бяжо Жуниор Буономо 18 июнь, якшанба куни Италия шимолидаги Кириньяго шаҳарчасида ўлдириб кетилди, деб ёзади «РИА Новости» маҳаллий ОАВларга таяниб. Россиянинг Миландаги бош консулхонаси аёлнинг ҳақиқатан ҳам Россия фуқароси бўлганини текширмоқда.
Қўш қотиллик 50 ёшли профессор Стефано Пераленинг уйида содир этилган, у Шакурова билан таниш бўлган ва илгари у билан яқин алоқада бўлган. 18 июнга ўтар кечаси кучли асабийлашиш ҳолатида бўлган Пераленинг ўзи полицияга қўнғироқ қилиб, икки кишини ўлдирганини маълум қилган. Жиноят жойига етиб келган полиция ходимлари Шакурова ва Буономонинг жасадларини аниқлаган.
Перали рашк сабабли қотилликка қўл урганини дарҳол тан олган. Ўзининг сўзларига кўра, у Шакурова ва унинг дўстини уйига меҳмонга чақирган, уларнинг ичимликларига наркотик модда қўшиб берган, сўнг аёлни ётоқхонада бўғиб ўлдирган. Шундан кейин Буономони таёқ билан савалай бошлаган, у қочиб кетишга уринган, аммо қўлидан келмаган ва у ҳам ўлдирилган.
Италия полицияси ходимлари тезкорлик билан Россиянинг Миландаги бош консулхонасига воқеа ҳақида хабар берган. Аммо айни пайтда Шакурованинг Россия фуқароси эканлиги ҳақида аниқ маълумот йўқ.
Изоҳ (0)