Миср хавфсизлик кучлари Саудия Арабистонига берилаётган Қизил денгиздаги Тиран ва Санафир оролларига боришни тўлиқ ман этди. Бу ҳақда «ТАСС» маълум қилди.
Egypt Independent нашрига кўра, мамлакат расмийлари Тиран қирғоқларида балиқ овлаш ва сайёҳлар учун дайвинг-сайрни тақиқлади.
Бу маҳаллий парламент Саудия Арабистони билан денгиз чегараси демаркацияси ҳақидаги келишувни ратификация қилиб, икки баҳсли орол Ар-Риёдга берилишини маъқуллаганидан сўнг рўй берди. Ҳужжат уни Миср президенти Абдулфаттоҳ ас-Сисий имзолаганидан сўнг кучга киради.
Саудияга оролларнинг берилиши мамлакатда норозиликларга ҳам сабаб бўлмоқда. Жумладан, Искандария шаҳрида бунга қарши чиққан 8 киши қўлга олинди. Қоҳирада тартибсизликларга йўл қўймаслик мақсадида полиция марказий кўчалар ва майдонларда хавфсизлик чораларини кучайтирди. Келишув ратификация қилинишини ёқламаган бир неча депутат истеъфога чиқишга тайёрлигини билдирди.
Изоҳ (0)