Филиппинда ИШИД террорчилик ташкилоти томонидан эгаллаб олинган Марави шаҳрида 14 соат давом этган жанг оқибатида 13 нафар ҳарбий хизматчи ҳалок бўлди ҳамда 40 га яқини жароҳат олди. Бу ҳақда Reuters агентлигига таяниб, «Корреспондент.net» хабар берди.
Хабар берилишича, ҳарбийлар Агус дарёсидаги кўприкни кесиб ўтиб, шаҳар савдо марказига яқинлашаётганида гранатамёт ҳамда снайперлар ўқи оқи остида қолган.
«Снайперларининг ҳар бир ўқидан кимдир ҳалок бўлди ёки жароҳат олди», — деди шаҳардан туриб жангларни ҳар куни кузатаётган нафақадаги полковник Пендатон Гуро.
Минданао оролининг марказий қисмидаги жанглар тўрт ҳафтадан бери давом этмоқда.
«Жангарилар қанча кўп мудофаада турса, президент Родриго Дутертенинг ҳокимияти шунчалик катта зарар кўради… У Марави шаҳрини бир неча кун ичида жангарилардан озод қилишга ваъда берган. Курашнинг чўзилиб кетиши ИШИД минтақада халифаликни ташкил қилиши хавфини ортишига сабаб бўлади», — деб ёзади агентлик.
Май ойи охирида Марави шаҳридаги ҳукумат кучлари ҳамда ИШИД жангарилари ўртасидаги курашлар оқибатида 100 дан ортиқ одам, жумладан, тинч аҳоли ҳам ҳалок бўлди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)