АҚШ Ҳарбий-денгиз кучларининг Fitzgerald эсминеци 17 июнь, шанба тонгида Япония соҳиллари яқинида контейнерлар ташийдиган Филиппин савдо кемаси билан тўқнашиб кетди. Бу ҳақда Америка Қуролли кучларининг Тинч океани қўмондонлиги расмий вакили Дэвид Бенхем маълум қилди, деб хабар берди «ТАСС».
«Fitzgerald 17 июнь тонгги 2:30 да Ёкосукадан (Япония) 103 километр жануби-ғарбда савдо кемаси билан тўқашиб кетди», — дея таъкидлади Дэвид.
Эсминец қўмондони Брайс Бенсон жиддий жароҳат олиб, Ёкосука шифохонасига эвакуация қилинган.
«Интерфакс» нашрининг АҚШ Ҳарбий-денгиз флоти вакилларига таяниб берган хабарига кўра, тўқнашув оқибатида тўрт нафар денгизчи жароҳат олган ва яна етти нафари бедарак йўқолган.
Филиппин кемаси экипажи аъзоларидан ҳеч ким жароҳат олмаган. Ҳодиса оқибатида эсминецнинг бир нечта бўлмасига сув тошган, кейинроқ бу жараён тўхтаган, деб ёзади Meduza.
Маълумот учун, Fitzgerald эсминецининг сув сиғими саккиз минг тоннадан ортиқ, узунлиги — 154 метр. ACX Crystal контейнер ташувчисининг сув сиғими 29 минг тонна, узунлиги эса 220 метрга тенг.
Изоҳ (0)