«Қувноқлар ва зукколар ҳамдўстлиги» халқаро фестивали доирасида ҳарбий-таълим муассасалари ўртасида ўтказилган «ҚВЗ — 2017» ўйинларида қатнашган Ўзбекистон вакиллари — «Шарқ юлдузи» жамоаси учинчи ўринни эгаллади, деб ёзади ЎзА.
Ўзбекистон Республикаси Мудофаа вазирлиги ходимлари, жамоатчилик вакиллари Тошкент темирйўл вокзалида Москвадан қайтиб келган жамоа аъзоларини тантанали кутиб олди.
Ўзбекистон Республикаси мудофаа вазири ўринбосари Музаффар Солиев ва бошқалар мамлакатда миллий армия учун юқори малакали мутахассислар тайёрлашга қаратилган самарали олий ҳарбий таълим тизими ташкил этилганини таъкидлади. Ҳарбий таълим муассасалари курсант ва тингловчилари ҳарбий касб билан биргаликда ўзининг ижодий қобилиятини ҳам ривожлантириб, мамлакат ҳаётида фаол иштирок этиш имкониятига эга бўлмоқда. Ҳар бир олий ҳарбий таълим муассасасида қувноқлар ва зукколар клублари жамоалари ташкил этилган бўлиб, улар Ўзбекистонда ва хорижда ўтказилаётган тадбирларда муваффақиятли қатнашмоқда.
Ўзбекистон Республикаси Мудофаа вазирлиги таълим муассасалари курсантларидан ташкил этилган «Шарқ юлдузи» терма жамоаси қувноқлар ва зукколар ўйинларида бетакрор шарқона ҳазил-мутойиба, вокал санъати ва истеъдодини намойиш қилди.
Изоҳ (0)