Манчестерда рўй берган теракт — 2000 йилдан бери концертларда содир бўлган тўртинчиси бўлди

22 май куни Буюк Британиянинг Манчестер шаҳридаги стадионда юз берган теракт оқибатида 22 киши ҳалок бўлди, 59 киши жароҳат олди, деб хабар берди «ТАСС».

Портлаш рўй берган стадионда америкалик қўшиқчи Ариана Гранде концерт бераётган эди. Ушбу теракт 2000 йилдан бери концерт ёки мусиқий фестивалларда содир бўлган тўртинчи йирик терактдир.

2003 йил 5 июль. Москвадаги Тушинский аэродромида «Қанотлар» рок-фестивали бўлаётган маҳалда икки нафар террорчи-худкуш портловчи қурилмани ишга тушириб юборган. Битта портлаш ғазна ёнида, иккинчиси — аэродром ҳудудига киришнинг яқин жойида содир бўлган. Воқеа жойида 10 киши ҳалок бўлган, 57 нафар одам жароҳат олган. Тўрт нафар жабрланувчининг жони шифохонада узилган.

Ҳужумни чечен миллатига мансуб 19 ёшли Зулихан Элихажиева ва 28 ёшли Марям Шарипова амалга оширган. Портловчи қурилмаларнинг учинчиси Zaraма Мужахоевада бўлган, бироқ у ишламай қолган — террорчи 10 июль куни қўлга олинган ва 20 йилга қамоқ жазосига маҳкум қилинган. Терактни ташкиллаштириш бўйича масъулиятни чечен террорчиси Шамил Басаев ўз бўйнига олган.

2010 йил 26 май. Россиянинг Ставропол шаҳридаги маданият ва спорт саройи яқинида, «Вайнах» чечен рақс ансамблининг концерти бошланиши арафасида портлаш рўй берган. Бомба шарбат қоғозхалтаси остига яширилган бўлган. Кириш эшигида навбатда турган саккиз нафар инсон ҳалок бўлган, 16 киши жароҳат олган. 2010 йил ноябрда теракт ташкилотчиларидан бири, Доғистонда истиқомат қилувчи Черкес Рустамов қўлга олинган эди. У умрбод қамоқ жазосига маҳкум қилинган. 2011 йилда махсус операция натижасида Рустамовнинг икки нафар шериги йўқ қилинган.

2015 йил 13 ноябрь. Париж ва Сен-Дени шаҳри яқинида деярли бир вақтнинг ўзида мувофиқлаштирилган терактлар серияси рўй берган эди. Террорчи-худкушлар Eagles of Death Metal рок гуруҳи концерт бераётган Bataclan концерт залига ҳужум уюштирган. Томошага келганлар террорчилар томонидан асирга олинган эди, полициянинг махсус кучлари етиб келганидан сўнг эса оммавий отишмани бошлаган. Bataclan залида 89 нафар одам ҳалок бўлган (13 ноябрь куни содир бўлган терактлар серияси оқибатида умумий миқдорда 130 киши ҳалок бўлган эди). Теракт бўйича масъулиятни ИШИД ташкилоти ўз бўйнига олган.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.