Буюк Британия ҳукумати мессенжерларга маълумотларни шифрлашни тақиқлаш ниятида. Бу ҳақда, Mirror нашрига таяниб, «Коммерсант.ru» хабар берди.
Ушбу қонун лойиҳасига кўра, ҳукумат мессенжерлар зиммасига фойдаланувчиларнинг шахсий ёзишмаларини тақдим этиш мажбуриятини ҳам қўйишни режалаштирган. Расмийлар суд ордерини тақдим этган тақдирда, улар бир иш куни давомида маълумотларни «тушунарли форматда» ва «электрон ҳимоясиз» тақдим этилиши лозим бўлади.
Бундан ташқари, компания ўз маҳсулоти ҳукумат талабига мос келиши учун ўзгартириш мажбуриятини ҳам олиши мумкин.
Нашрнинг ёзишича, янги ҳужжат WhatsApp, iMessage, ва Telegram мессенжерлари учун амал қилади. Ушбу қонун лойиҳасининг муҳокамаси 19 майга қадар тугаши кутилаётганига қарамай, ҳукумат расмий ўзгариш ҳақида ҳеч қандай эълон берганича йўқ.
Аввалроқ Буюк Британия Ички ишлар вазири Эмбер Радд WhatsApp ва бошқа мессенжерлар хабарларни шифрлашига йўл қўймаслик керак дея фикр билдирган эди.
Изоҳ (0)