Buyuk Britaniya hukumati messenjerlar zimmasiga yozishmalar haqida ma’lumotlarni taqdim etish majburiyatini qo‘ymoqchi

Buyuk Britaniya hukumati messenjerlarga ma’lumotlarni shifrlashni taqiqlash niyatida. Bu haqda, Mirror nashriga tayanib, “Kommersant.ru” xabar berdi.

Ushbu qonun loyihasiga ko‘ra, hukumat messenjerlar zimmasiga foydalanuvchilarning shaxsiy yozishmalarini taqdim etish majburiyatini ham qo‘yishni rejalashtirgan. Rasmiylar sud orderini taqdim etgan taqdirda, ular bir ish kuni davomida ma’lumotlarni “tushunarli formatda” va “elektron himoyasiz” taqdim etilishi lozim bo‘ladi.

Bundan tashqari, kompaniya o‘z mahsuloti hukumat talabiga mos kelishi uchun o‘zgartirish majburiyatini ham olishi mumkin.

Nashrning yozishicha, yangi hujjat WhatsApp, iMessage, va Telegram messenjerlari uchun amal qiladi. Ushbu qonun loyihasining muhokamasi 19-mayga qadar tugashi kutilayotganiga qaramay, hukumat rasmiy o‘zgarish haqida hech qanday e’lon berganicha yo‘q.

Avvalroq Buyuk Britaniya Ichki ishlar vaziri Ember Radd WhatsApp va boshqa messenjerlar xabarlarni shifrlashiga yo‘l qo‘ymaslik kerak deya fikr bildirgan edi.