Франция сайловолди кампаниясини назорат қилиш Комиссияси ОАВларни президентликка номзод Эммануэль Макрон штабининг хакерлар ҳужуми оқибати тарқаб кетган ёзишмаларидаги маълумотларни нашр қилмасликка чақирди, деб хабар берди «Коммерсантъ».
Комиссия раиси ОАВларни ўз бўйниларидаги масъулиятига, жумладан, эркин ва адолатли овоз бериш жараёнидаги мажбуриятига эътибор қаратди.
«Шундай қилиб, у оммавий ахборот воситаларидан, жумладан, уларнинг сайтларидан ҳам ушбу маълумотларни тарқатмасликни талаб қилиб, ёлғон маълумот тарқатиш қонунга биноан жазоланиши ҳақида огоҳлантирди», — дея комиссия эълонидан парча келтиради «РИА Новости».
Аввалроқ, WikiLeaks ташкилоти Эммануэль Макрон штабига тегишли электрон хатларнинг катта миқдори тарқаб кетгани ҳақида хабар берганди. Ташкилот ҳужжат жуда кеч эълон қилингани сабаб сайлов жараёнига таъсир қилмаган, дея ҳисобламоқда.
Эслатиб ўтамиз, 23 апрель куни Францияда президентлик сайловининг биринчи босқичи бўлиб ўтди. Иккинчи босқич 7 май куни ўтказилади, унда Марин Ле Пен ва Эммануэль Макрон иштирок этади.
Изоҳ (0)