Хотира ва қадрлаш кунига бағишланган кўргазмада 80 ёшли меҳнат фахрийсининг чизмалари намойиш этилди

Тошкент Фотосуратлар уйида Хотира ва қадрлаш куни муносабати билан кўргазма очилди, деб хабар бермоқда ЎзА.

Очилиш маросимида Ўзбекистон Бадиий академияси раиси Акмал Нур ва бошқалар ёши улуғ инсонларга, хусусан, Иккинчи жаҳон уруши қатнашчилари, фронт орти меҳнат фахрийларига ҳурмат кўрсатиш, уларнинг турмуш тарзини яхшилаш ва қўллаб-қувватлашга қаратилган алоҳида эътибор юксак самара бераётганини таъкидлади.

«Бугунги тадбирга таклиф этилганимдан бошим кўкка етди, — деди меҳнат фахрийси V.Зиёев. — Давлатимиз томонидан ёши улуғ инсонларга кўрсатилаётган эътибор бизни яна ижодга ундаяпти. 80 ёшга кирсам-да, қўлимдан мўйқаламим тушгани йўқ. Яқинда шахсий кўргазмамни санъат ихлосмандлари эътиборига ҳавола этдим, бугунги тадбирда ҳам бешдан ортиқ чизмам намойиш қилинмоқда».

Кўргазмада Иккинчи жаҳон уруши қатнашчиси Й.Гадеский, меҳнат фахрийлари М.Йўлдошев, А.Мўминов, V.Зиёев, А.Слугин, Г.Серов, Й.Шубина, А.Донес каби мусаввир ва фоторассомлар ижодидан намуналар ҳавола этилмоқда.

Уруш ва меҳнат фахрийларига совғалар тақдим этилди. Ўзбекистон Бадиий академияси Республика ихтисослаштирилган санъат мактаб-интернатининг хор жамоаси томонидан ижро этилган қўшиқлар тадбирга ўзгача шукуҳ бағишлади.