Янгиқўрғонда кўтарилган муаммоларнинг ярми депутат ва сенаторлар томонидан жойида ҳал этилди

Олий Мажлис Қонунчилик палатаси депутатлари ва Сенат аъзоларидан иборат ишчи гуруҳ Наманган вилоятининг Янгиқўрғон туманида иш бошлади. Бу ҳақда Янгиқўрғон туман ҳокимлиги ахборот хизмати хабар бермоқда.

Ўрганиш жараёнида тумандаги 1000 га яқин хонадонда бўлиб, аҳолининг шикоят ва таклифлари ўрганилди. Мулоқотлар давомида турли йўналишлардаги 426 та муаммо кўтарилди. Улардан 210 таси депутатлар ва сенаторлар томонидан жойида ҳал этилди.

Жумладан, Қонунчилик палатаси депутати Иброҳим Ҳожиев «Бирлик», «Тинчлик» ва «Ҳадикент» маҳалла фуқаролар йиғинларидаги хонадонларда бўлди. Учрашувлар давомида қарийб юзга яқин фуқаро билан суҳбатлашилди. «Бирлик» маҳалласида яшовчи Муҳаббат Парпиева маҳалла ҳудудида 3—4 йилдан бери табиий газ бўлмаса-да, «Янгиқўрғон тумангаз» филиали томонидан ҳудуддаги хонадонларга 98 миллион сўм қаздорлик ҳисобланганидан шикоят қилди. Масалага ойдинлик киритиш ва юқоридаги муаммони ҳал этиш филиал раҳбари Отабек Убаевга ҳавола этилди ва бажарилиши назоратга олинди.

Қонунчилик палатаси депутати Шуҳрат Тўхтабоев саъй-ҳаракатлари билан Ғовазон қишлоғида истиқомат қилувчи Дилшода Қаюмова мактабгача таълим муассасасига ишга жойлаштирилди. Ҳожиакбар Ҳалиловга иссиқхона барпо этиш учун «Микрокредитбанк» туман филиали томонидан 4,3 миллион сўм кредит ажратилди.

Ишчи гуруҳ томонидан тўпланган материаллар халқ депутатлари Янгиқўрғон туман кенгаши сессиясида танқидий муҳокама этилди. Сессияда Қонунчилик палатаси депутати Акмал Раҳмоновнинг ўрганиш натижалари юзасидан маърузаси тингланди.

Маърузада, хусусан, тумандаги кўп қаватли уйларнинг аксари томи мукаммал ва жорий таъмирга муҳтожлиги, 20 га яқин мактабгача таълим муассасаси мослаштирилган бинода фаолият юритиши, бир қатор мактабларда қўшимча бино қуришга эҳтиёж мавжудлиги қайд этилди.

Туман тиббиёт бирлашмасига тор доирадаги шифокорлар етишмайди. Деярли барча ҚВПларда электр энергияси билан узлуксиз таъминлашда муаммолар мавжуд.

Ҳудудга юқори кучланишли трансформатор ўрнатишга эҳтиёж сезилмоқда. Давлат аҳамиятидаги йўлларнинг 14,8, маҳаллий йўлларнинг 12,5 километри таъмирга муҳтож.

Маърузада кўтарилган масалалар юзасидан туман ҳокими, прокурори ва ИИБ бошлиғинг ҳисоботлари тингланди. Фаолияти танқидий баҳоланган мутасаддилардан масъулият талаб этилди.

Сессияда Олий Мажлис Қонунчилик палатаси Спикери Нурдинжон Исмоилов қатнашди ва сўзга чиқди.