24 апрель куни ўзаро келишувга мувофиқ Ўзбекистон Президенти Шавкат Мирзиёев билан Қозоғистон президенти Нурсултон Назарбоев ўртасида телефон орқали мулоқот бўлиб ўтди. Бу ҳақда ЎзА хабар бермоқда.
Давлат раҳбарлари сиёсий, савдо-иқтисодий, транспорт-коммуникация, илмий-техник, маданий-гуманитар ва бошқа соҳаларда ўзаро манфаатли ҳамкорлик фаоллашганини мамнуният билан қайд этди.
2017 йилнинг 22—23 март кунлари Остона шаҳрида бўлиб ўтган олий даражадаги самарали музокаралар Ўзбекистон—Қозоғистон ўртасидаги стратегик шериклик муносабатларини амалий мазмун билан бойитди ва ўзаро ҳамкорликнинг янги истиқболларини белгилаб берди.
Томонлар яқин йилларда қулай шароитлар яратиш, бизнес субъектлари ўртасида бевосита ва узоқ муддатли шериклик алоқаларини ўрнатишга кўмаклашиш, транспорт-коммуникация ва транзит салоҳиятини ошириш ҳисобидан ўзаро товар айирбошлаш ҳажмини 5 миллиард долларга етказиш ҳақидаги мўлжалини тасдиқлади.
Ҳудудлараро, авваламбор, чегараолди ҳудудлар ўртасида алоқаларни янада кенгайтириш, маданий-гуманитар муносабатларни фаоллаштириш қўллаб-қувватланди.
Икки томонлама ҳамкорлик бўйича ҳукуматлараро қўшма комиссия ўзаро ҳамкорликнинг барча йўналишларини ривожлантиришда муҳим аҳамият касб этиши таъкидланди.
Давлат раҳбарлари Ўзбекистон ва Қозоғистон қардош халқларининг вақт синовидан ўтган ўзаро муносабатларига амал қилган ҳолда, бундан буён ҳам икки мамлакат барқарор иқтисодий тараққиётини таъминлашга қаратилган қўшма дастур ва лойиҳаларни амалга оширишни қўллаб-қувватлашини қайд этди.
Томонлар минтақавий ва халқаро сиёсатга оид айрим масалалар юзасидан ҳам фикр алмашди. «Суҳбат Ўзбекистон—Қозоғистон муносабатларига хос самимий ва дўстона, ўзаро англашув ва ҳурмат руҳида ўтди», — дейилади ЎзА ахборотида.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)