Ўзбекистонда олий маълумотли ҳамшираларнинг малака ошириш жойи ўзгарди

Вазирлар Маҳкамасининг «Тиббиёт ходимларининг малакасини ошириш ва уларни қайта тайёрлаш тизимини такомиллаштиришга доир қўшимча чора-тадбирлар тўғрисида»ги қарорига кўра, 2017/2018 ўқув йилидан бошлаб Тошкент врачлар малакасини ошириш институтида олий маълумотли тиббиёт ҳамширалари ва тиббиёт техникаси бўйича мухандис-техник ходимлар ҳам малака оширади.

Соғлиқни сақлаш вазирлиги ахборот хизмати бошлиғи Фурқат Санаевнинг «Дарё»га маълум қилишича, илгари олий маълумотли ҳамширалар Республика ўрта тиббиёт ва доришунос ходимлар малакасини ошириш ва ихтисослаштиришдан ўтказиш марказида малака оширар эди. «Аммо ушбу мезон ўзини оқламади», — дейди Санаев.

Хабар беришларича, 2018 йил 1 январдан бошлаб Соғлиқни сақлаш вазирлиги муассасалари ва аҳолига тиббий хизматлар кўрсатувчи бошқа ташкилотларнинг тиббиёт ходимлари малакасини оширишнинг ягона электрон маълумотлар базаси жорий этилади.

Ушбу базада малака ошириш тизимига доир барча маълумотлар битта жойда жамланади, унга мутахассислар, ўқув дастурлари, малака ошириш соатлари, малака оширган мутахассис ҳақида маълумотлар киритилади.

«Дарё»нинг Telegram’даги расмий канали — @toshqindaryo’га аъзо бўлинг!