Ўзбекистон Вазирлар Маҳкамаси 4 апрель куни «Тиббиёт ходимларининг малакасини ошириш ва уларни қайта тайёрлаш тизимини такомиллаштиришга доир қўшимча чора-тадбирлар тўғрисида»ги қарорни қабул қилди. Бу ҳақда Соғлиқни сақлаш вазирлиги матбуот хизмати «Дарё»га маълум қилди.
Вазирлик ахборот хизмати бошлиғи Фурқат Санаевнинг маълум қилишича, илгари Ўзбекистонда тиббиёт ходимлари малакасини ошириш ва уларни қайта тайёрлаш учта муассасада — Тошкент врачлар малакасини ошириш институти, Самарқанд давлат тиббиёт институти ва Андижон давлат тиббиёт институтининг малака ошириш факультетларида амалга оширилар эди.
Ҳозирда мамлакатда 72 мингдан ортиқ шифокор фаолият юритаётганини инобатга олинса, атиги учта муассаса улар малакасини ошириш ва қайта тайёрлаш вазифасини тўла-тўкис амалга ошира олмаслиги яққол намоён бўлади. «Жойларга чиқиб ҳақиқий ҳолат ўрганилганда, айрим мутахассислар ‘қоғозда бору, амалда йўқ’ қабилида малака ошириб келаётгани ҳам аниқланди», — дейди Фурқат Санаев.
Эндиликда тиббиёт ходимлари малакасини ошириш ва уларни қайта тайёрлаши имконияти нафақат Тошкент врачлар малакасини ошириш институти, балки барча тиббиёт олий таълим муассасалари ҳузуридаги врачлар малакасини ошириш факультетлари, кафедра ва курслари, тиббиёт олий таълим муассаслари клиникалари, республика ихтисослаштирилган тиббиёт марказлари, илмий-тадқиқот муассасалари, Республика даволаш-профилактика муассасаларига ҳам берилди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)