Тошкентда хизмат гувоҳномасини қалбакилаштирган «майор» қўлга олинди

Тошкент шаҳар ИИББда 20 апрель куни бўлиб ўтган брифингда қалбаки хизмат гувоҳномаси билан ўзини ИИВ ходими деб таништирган шахс қўлга олингани маълум қилинди.

Мирзо Улуғбек туманида жойлашган блок-постда хизмат олиб бораётган ходимлар томонидан Тошкент вилоятига чиқиб кетаётган фуқаро Бўронов бошқарувидаги Cobalt русумли автомашина тўхтатилиб, текширилганда ҳайдовчи ўзини Ўзбекистон ИИВ шахсий таркиб билан ишлаш инспекцияси бошлиғи, майор Бўронов деб таништирган ва хизмат гувоҳномасини кўрсатган.

Суриштирув жараёнида ушбу гувоҳнома қалбакилаштирилгани аниқланган. Ҳолат юзасидан Жиноят кодексининг 228-моддаси иккинчи қисмининг «а» банди ва  шу модданинг учунчи қисми (расмий ҳужжатларни қалбакилаштириш ва ундан фойдаланиш жинояти аломатлари) билан жиноий иш қўзғатилган.

Тошкент шаҳар ИИББ фуқаролардан, агар бирор киши мазкур фуқаронинг қалбакилаштирилган хизмат гувоҳномасига ишониб, унинг алдовига учган бўлса, ички ишлар идораларига хабар беришни сўрайди.

Тошкент шаҳар ИИББ мурожаати