Фиттипальди суперкари 1,5 миллион долларга баҳоланди

Икки карра Формула-1 ҳамда Американинг нуфузли «Инди 500» пойгаси ғолиби Эмерсон Фиттипальди томонидан асос солинган Fittipaldi Motors компанияси ҳар бири 1,5 миллион доллар турадиган 39 дона суперкар ишлаб чиқаради. Бу ҳақида Automotive News нашрига таяниб, «Мотор» хабар қилди.

Fittipaldi Motors суперкари биринчи бор шу йилнинг март ойида Женева автасалонида намойиш қилинган эди. Автомобиль дизайни Pininfarina фирмаси томонидан ишланган, инжиниринг билан эса немис DTM автомобиль чемпионатидаги Mercedes-Benz компаниясининг ҳамкори HWA фирмаси шуғулланган.

Фақат пойга учун мўлжалланган карбонли купе атмосфера ҳажми 4,8 литр бўлган саккиз цилиндрли, 600 от кучига эга ва олти поғонали секвентал трансмиссия билан жиҳозланган. Автомобиль оғирлиги 1000 килограмм. Динамик хусусиятларига аниқлик киритилмаган.

Автомобиль HWA’нинг Штутгартдаги корхонасида йиғилади. Ҳар бир машинанинг ранги алоҳида — такрорланмас бўлади.

«Дарё»нинг Telegram’даги расмий канали — @toshqindaryo’га аъзо бўлинг!