Тошкентда «Япон киноси кунлари» бўлиб ўтади

24—26 март кунлари Алишер Навоий номидаги кино саройида япон тили ва маданиятига қизиқувчилар учун «Ўзбеккино» Миллий агентлиги билан ҳамкорликда «Япон киноси кунлари» бўлиб ўтади, дея хабар беради «Жаҳон» ахборот агентлиги.

Ўзбек киноихлосмандлари эътиборига япон режиссёрларининг бешта — иккита бадиий ва учта анимацион фильмлари ҳавола этилади.

Фильмларда япон мактабларининг ҳозирги аҳволи, жамиятдаги долзарб муаммолар ва албатта севги ҳақида ҳикоя қилинади.

Фестиваль очилиши 24 март соат 18:00 да бўлиб ўтади. Биринчи бўлиб режиссёр Томоюки Фурумаянинг «Ўн олти ёшлилар учун Бусидо» драмаси намойиш этилади.

Фильмда япон халқининг ғалабага интилувчанлиги ҳамда руҳий олами ҳислатлари ёрқин тасвирлаб берилган.

Барча фильмлар япон тилида рус субтитрлари билан намойиш этилади. Тошкентдаги Япония элчихонасининг хабар беришича, намойишларга кириш барча хоҳловчилар учун бепул.

«Дарё»нинг Telegram’даги расмий канали — @toshqindaryo’га аъзо бўлинг!