Американинг Warner Bros. киностудияси «Матрица» фантастик фильмининг ремейки устида иш бошлади. Бу ҳақда ўз манбаларига таяниб, Hollywood Reporter нашри хабар берди, деб ёзади «РИА Новости».
Ремейк сценарийсини ёзиш борасида «Х-одамлар» ҳамда «Қасоскорлар» фильмининг сценарий муаллифи Зак Пенн билан музокаралар олиб борилмоқда. Шунингдек, ремейкда Майкл Бакари Жордан ҳам суратга тушиши кутилмоқда.
Ҳозирча янги лойиҳа қандай кўринишда бўлиши номаълум. Ремейкда оригинал «Матрица» фильми режиссёри ҳамда сценарий муаллифи бўлган Вачовскиларнинг иштироки аниқлаштирилмаган. Манбанинг хабарига кўра, янги фильм ҳақидаги ғоя «Матрица» трилогияси продюссери Жоэл Сильвердан чиққан.
Аввалроқ машҳур актёр Киану Ривз лойиҳани амалга оширишда Вачовскилар иштирок этсагина, «Матрица» оламига қайтишга тайёр эканлигини билдирган эди. Бунинг устига у ремейкни эмас, фильмнинг давомини назарда тутган.
«Матрица»нинг учала фильми ҳам ака-ука Вачовскилар томонидан суратга олинган эди. Фильмнинг биринчи қисми 1999 йилда, кейингилари эса 2003 йилда экранларга чиққан. «Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)