ИШИД террорчилик ташкилоти жангарилари Ироқ армияси ҳарбий хизматчиларига қарши заҳарловчи газ снарядларини қўллади. Бу ҳақда ҳужум оқибатида журналистлари жабрланган Rudaw телеканали маълум қилди, деб ёзади «Корреспондент.net».
Ҳодиса Мосул ғарбий қисмидаги Баб-эт-Тут туманида юз берди. Снаряд портлагандан сўнг жабрланувчиларда йўтал ва кўнгил айниши бошланди.
Аввалроқ БМТ Мосулда кимёвий қурол қўлланилиши оқибатида 12 киши, жумладан, аёллар ва болалар жабрланган бўлиши мумкинлигини маълум қилган эди. Бироқ Ироқнинг БМТ ҳузуридаги доимий вакили Ал ал-Ҳаким Бағдод жангарилар томонидан заҳарловчи моддалар қўлланганлиги ҳақида далилларига эга эмаслигини билдирди.
Ироқ ҳукумат қўшинлари Мосул ғарбий қисмини озод этиш бўйича операцияни давом эттирмоқда.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)