Рашид Алимов: ШҲТга аъзо давлатлар наркотаҳдидга қарши курашнинг олдинги чизиғида турибди
Шанхай ҳамкорлик ташкилоти ва унга аъзо давлатлар минтақада ҳамда дунёда наркотиклар хавфига қарши курашда изчил чоралар кўриб келмоқда. Бу ҳақда Австрия пойтахти Венада бўлиб ўтаётган БМТ наркотик моддалар бўйича комиссиясининг 60-сессиясида иштирок этаётган ШҲТ бош котиби Рашид Алимов маълум қилди, дея хабар беради «ТАСС».
«Охирги йилларда наркобизнес кўлами кенгайиши ва гиёҳвандлик тарқалиши суръатларининг ортиб бориши таҳдидли кўриниш олди. Бу ҳолат жамият ва давлат ҳаётининг деярли барча соҳаларига чуқур салбий таъсир кўрсатиб, ижтимоий асослар, хусусан, миллатлар генофондини қўпориб келмоқда. Тузилмамизга аъзо давлатлар ўзларининг жуғрофий жойлашувига кўра наркотаҳдидга қарши курашнинг олдинги чизиғида турибди», — дея таъкидлади ШҲТ бош котиби.
Рашид Алимов ШҲТга аъзо 6 давлатдан учтаси чегарадош бўлган Афғонистондан наркотиклар оқими тўхтамаётганлигига алоҳида эътибор қаратди.
«Шанхай ҳамкорлик ташкилоти аъзолари Афғонистон масаласида икки ва кўп томонлама шаклларда ҳамкорликка ҳозир эканликларини билдирмоқда. Наркотаҳдидга фақат дунё ҳамжамияти уринишларини бирлаштириш орқали самарали қарши туриш мумкин ва ШҲТ бунга тайёр», — дея қўшимча қилди Рашид Алимов.
