Handelsblatt нашрининг хабар беришича, Бирлашган Араб Амирликларининг Emirates ва Etihad авиакомпанияларининг раҳбарлари компанияларни бирлаштириш имкониятларини кўриб чиқиш бўйича музокаралар олиб бормоқда. Музокараларга асос сифатида фойданинг пасайиб кетгани кўрсатилмоқда. 2016—2017 йилнинг биринчи ярмида Emirates’нинг фойдаси доллар қийматининг ошиши ва «бозордаги ноқулай шароит» туфайли 75 фоизга қисқарди. Бу ҳақда «Коммерсантъ» маълум қилди.
2016 йил октябрь ойида Emirates хизматлар учун қўшимча тўловлар киритишни «жиддий кўриб чиқаётгани» маълум бўлган эди. Etihad ўтган йил бўйича якуний ҳисоб-китобларни маълум қилгани йўқ, бироқ компания 2016 йил охирида йўналишлари сонини 116 тадан 112 тага қисқартирди. Шунингдек, компания томонидан чекловларни қисқартириш ва фойдани ошириш режалари ҳақида маълум қилинган эди.
Etihad’нинг маълум қилишича, аввалроқ Emirates билан альянс тузиш ва ҳатто бирлашиш имкониятлари ҳам бўлган эди. Бироқ компания музокаралар ҳақидаги ҳозирги маълумотларни рад этди. Emirates эса бу маълумотларга ҳеч қандай изоҳ бермади.
Handelsblatt’нинг маълум қилишича, экспертлар икки авиакомпаниянинг бирлашиши компаниялар раҳбарлари ва эгалари ўртасида мураккаб келишувларни талаб қилади деб ҳисобламоқда, бироқ бундай эҳтимол ҳозирги вақтда нореал ҳисобланмайди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)