Исландия дунёда биринчи бўлиб эркаклар ва аёллар иш ҳақини тенглаштиради

Исландия аёллар ва эркакларнинг иш ҳақи миқдорини тенглаштирган биринчи мамлакатга айланади, деб ёзади «Корреспондент.net».

«Исландия иш берувчиларга уларнинг ходимларга жинси, этник келиб чиқиши ёки миллатидан қатъи назар, тенг миқдорда иш ҳақи тўлаётганини исботлаш мажбуриятини юклайдиган дунёдаги биринчи мамлакатга айланади», — дейилади AP хабарида.

Мамлакат шу тариқа, 2022 йилгача меҳнат ҳақи бўйича жинслар ўртасидаги номувофиқликни таг-томири билан йўқ қилмоқчи.

Мамлакат ҳукумати шу ойдаёқ парламентга 25 дан ортиқ ходимга эга барча иш берувчилардан тенг иш ҳақи тақдим этилаётганини исботловчи сертификатни талаб қилувчи қонун лойиҳасини киритади.