Samsung вице-президенти ва амалдаги раҳбари Ли Чжэ Ён ҳамда компаниянинг яна 4 нафар менежерига порахўрлик ва маблағларни ўмаришда айбловлар эълон қилинади. Бу ҳақда Жанубий Корея президенти Пак Кин Хе қуршовидаги коррупциявий можарони текшираётган тергов гуруҳи маълум қилди, дея хабар беради «Ведомости».
Улар чет элда активларини яширишда ҳам айбланади. Гап можаро туфайли истеъфо берган компания президенти Чан Чун Жи ва раис ўринбосари Чой Си Сун ҳақида ҳам кетмоқда.
Samsung вице-президентига нисбатан парламентда ёлғон кўрсатма бериш бўйича айблов ҳам илгари сурилади. Компания мазкур ҳолат юзасидан изоҳ беришдан бош тортди.
Маълумот учун, Ли Чжэ Ён 17 февралда ҳибсга олинди ва шундан бери Сеул яқинидаги қамоқхонада сақлаб келинмоқда.
Изоҳ (0)