Лос-Анжелес (АҚШ, Калифорния штати) маъмурлари полициячилар томонидан қўлга олишга уриниш чоғида отиб ўлдирилган қора танли эркакнинг яқинларига 1,5 миллион доллар товон тўлашга рози бўлди. Бу ҳақда «ТАСС» хабар бермоқда.
АҚШда оммавий норозилик намойишларига сабаб бўлган ҳодиса 2014 йилда юз беганди. Шаҳарнинг нотинч ҳудудларида патруллашни амалга ошираётган полициячилар Шарлтон Уомплер ва Антонио Вильегас шубҳали кўринган 25 ёшли Изел Фордни чақирди. Бироқ у жавоб бермади ва кетиб юборишга уринди. Полициячилар эркакда наркотиклар борлигини гумон қилиб, уни қўлга олишга ҳаракат қилган.
Юзага келган олишувда Форд гўё Уомплернинг тўппончасини тортиб олишга ҳаракат қилган, полициячилар бунга жавобан ўқ узган. Эркак касалхонага ётқизилди, бироқ шифокорлар уни сақлаб қололмади.
Ҳуқуқ-тартибот ходимларига нисбатан текширув бошланди, бироқ унинг якунлари бўйича ҳеч қандай айблов илгари сурилмади. Расмийлар полициячилар ўзларини ҳимоя этишга мажбур бўлгани ва қонунни бузмаганлиги ҳақидаги хулосага келди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)