БМТ бош котиби Антониу Гутерриш Яқин Шарқ мамлакатлари бўйлаб илк сафарига отланмоқда, деб ёзади «ТАСС». У Миср, Туркияга ва Форс кўрфазидаги араб мамлакатларига ташриф буюради, сўнг G20’нинг Бонндаги учрашувида ҳамда Мюнхендаги хавфсизлик бўйича анъанавий конференцияда қатнашади.
Туркияда Гутерриш президент Ражаб Тоййиб Эрдўғон ва бош вазир Биноли Йилдирим билан, Ар-Риёдда эса Саудия Арабистони қироли Салмон ва иккинчи валиаҳд шаҳзода Муҳаммад бин Салмон Ал Сауд билан учрашмоқчи.
Бирлашган Араб Амирликларида мамлакат раҳбарияти билан учрашишдан ташқари, БМТ бош котиби Жаҳон ҳукумат саммитида нутқ сўзлайди, Уммон ва Қатарда эса уни расмий шахслар билан музокаралар кутмоқда. Яқин Шарқ турнеси доирасида сўнгги бекат Қоҳира бўлиб, у ерда Гутерриш Миср президенти Абдул Фаттоҳ ас-Сисий ва ҳукумат аъзолари билан учрашади.
Мисрдан чиқиб, БМТ раҳбари Боннга йўл олади, у ерда 16—17 февраль кунлари G20 ташқи ишлар вазирлари учрашуви бўлиб ўтади. 17—19 февраль кунлари ўтказиладиган Мюнхен конференциясида эса Гутерриш давлат ва ҳукумат раҳбарларини дипломатияга ва низолар олдини олишга кўпроқ эътибор қаратишга чақиради.
Изоҳ (0)