Los-Anjeles (AQSh, Kaliforniya shtati) ma’murlari politsiyachilar tomonidan qo‘lga olishga urinish chog‘ida otib o‘ldirilgan qora tanli erkakning yaqinlariga 1,5 million dollar tovon to‘lashga rozi bo‘ldi. Bu haqda “TASS” xabar bermoqda.
AQShda ommaviy norozilik namoyishlariga sabab bo‘lgan hodisa 2014-yilda yuz begandi. Shaharning notinch hududlarida patrullashni amalga oshirayotgan politsiyachilar Sharlton Uompler va Antonio Vilegas shubhali ko‘ringan 25 yoshli Izel Fordni chaqirdi. Biroq u javob bermadi va ketib yuborishga urindi. Politsiyachilar erkakda narkotiklar borligini gumon qilib, uni qo‘lga olishga harakat qilgan.
Yuzaga kelgan olishuvda Ford go‘yo Uomplerning to‘pponchasini tortib olishga harakat qilgan, politsiyachilar bunga javoban o‘q uzgan. Erkak kasalxonaga yotqizildi, biroq shifokorlar uni saqlab qololmadi.
Huquq-tartibot xodimlariga nisbatan tekshiruv boshlandi, biroq uning yakunlari bo‘yicha hech qanday ayblov ilgari surilmadi. Rasmiylar politsiyachilar o‘zlarini himoya etishga majbur bo‘lgani va qonunni buzmaganligi haqidagi xulosaga keldi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)