Япония ташқи ишлар вазири Фумио Кисида Курил оролларининг жанубий қисмини «Япониянинг азалий ҳудуди» деб атади ва Россия билан тинчлик ҳақидаги шартнома тузиш масаласи бўйича музокараларни давом эттиришни ёқлаб чиқди, деб ёзади «ТАСС».
«Шимолий ҳудудлар — бу Япониянинг азалий ҳудудлари. Биз тинчлик битимини имзолаш ҳамда янгича ёндашиш асосида тўртта шимолий оролларнинг кимга тегишлилиги муаммосини ҳал этиш мақсадида Россия билан музокараларни давом эттиришни ёқлаб чиқамиз», — деди Кисида.
У, шунингдек, тинчлик битими масаласида россиялик ҳамкасби Сергей Лавров билан икки томонлама мулоқотни давом эттириш ниятини билдирди.
Москва ва Токио ўтган аср ўрталаридан буён Иккинчи жаҳон уруши якунлари бўйича тинчлик шартномасини ишлаб чиқиш масаласида танаффуслар билан маслаҳатлашувлар олиб бормоқда. Бунга Курилнинг жанубий қисми кимга тегишлилиги муаммоси асосий тўсиқ бўлиб қолмоқда.
Изоҳ (0)