Франциянинг собиқ иқтисодиёт вазири Эмманюэль Макрон Франсуа Фийонни ортда қолдириб, президентлик пойгасининг янги етакчисига айланди. Бу ҳақда «Ведомости» хабар бермоқда.
BVA-Salesforce хизмати томонидан ўтказилган сўров натижаларига кўра, Макронда президентлик сайловининг иккинчи босқичига чиқиш ва унда «Миллий фронт» етакчиси Марин Ле Пенни мағлуб этиш имконияти катта.
Шунингдек, сўров Социалистлар партияси номзоди, собиқ таълим вазири Бенуа Амоннинг ҳам мавқейи мустаҳкамланаётганини кўрсатмоқда.
Сайловолди пойгаси аввалги етакчиси, собиқ бош вазир Франсуа Фийоннинг машҳурлиги рафиқаси Пенелопа билан боғлиқ можародан сўнг пасайиб кетди. Canard Enchaine нашрига кўра, Пенелопа Фийон турмуш ўртоғи депутат бўлиб турганда унинг ёрдамчиси сифатида 8 йил ичида 800 минг евродан ортиқ маош олган. Франция полицияси бу иш бўйича суриштирув доирасида Сенат биносида тинтув ўтказди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)