АҚШ Конгресси вакиллар палатаси спикери Пол Райан Эрон билан тузилган ядро дастури бўйича келишув ўз кучида қолади деб ҳисоблаши, бироқ Теҳронга қарши санкциялар кенгайтирилишини ёқлашини билдирди. Бу ҳақда «ТАСС» хабар бермоқда.
NBC телекомпанияси бошловчисининг Вашингтон ушбу келишувдан воз кечишни режалаштираётган ёки йўқлиги ҳақидаги саволига жавобан, лавозими жиҳатидан АҚШда учинчи шахс ҳисобланадиган Райан «яна ортга қадам ташлаш ва Эронга нисбатан олдинроқ амал қилган кўп томонлама санкцияларни қайтадан киритиш мумкин, деб ўйламайман. Бироқ ўзим бошидан бу келишувга қарши бўлганман», деди.
Пол Райан Эронни «дунёда террорчиликнинг йирик ҳомийси ва Сурияда вазиятни беқарорлаштираётган давлат» деб атади ва мамлакатга нисбатан санкциялар янада кенгайтирилишини ёқлаб чиқди.
Эслатиб ўтамиз, АҚШ Теҳрон томонидан баллистик ракеталар дастури ишлаб чиқилгани муносабати билан Эронга нисбатан санкциялар рўйхатини кенгайтирди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)