Шерлок Холмс ролини ижро этган Бенедикт Камбербэтчнинг Томас Эдисон қиёфасидаги биринчи сурати эълон қилинди

The Weinstein Company биографик драма бўлган «Токлар уруши» фильмидан дастлабки суратни эълон қилди. Бу фильмда актёр Бенедикт Камбербэтч кашфиётчи Томас Эдисон ролини ўйнаган. Бу ҳақда Entertainment Weekly нашрига таяниб, «Афиша Daily» хабар берди.

Фильм доимий ва ўзгарувчан токдан фойдаланиш имконияти устида курашган Томас Эдисон ва Жорж Вестингауз (бу ролни Майкл Шеннон ижро этган) ўртасидаги рақобат ҳақида ҳикоя қилади. Фильм воқеалари XIX асрнинг 80-йилларида бўлиб ўтган. Шунингдек, фильмда Том Ҳолланд, Николас Ҳолт, Кэтрин Уотерстон ва бошқалар суратга тушган. Фильм режиссёри «Мен, Эрл ва жон бераётган қиз» мелодрамасини суратга олган Альфонсо Гомес-Рехон. Картина продюссерларидан бири Тимур Бекмамбетов. Фильмнинг премьера санаси ҳозирча номаълум.

Бенедикт Камбербэтч Британиянинг «Шерлок» сериалида бош ролни ўйнагандан сўнг бутун дунёда машҳурликка эришди. Бундан ташқари, актёр «Бешинчи ҳокимият», «Доктор Стрэнж» ва «Тақлид ўйини» фильмларида суратга тушган. «Тақлид ўйини» фильмида актёр математик Алан Тьюринг ролини ўйнаган ва шу роль учун «Оскар» мукофотига номзод бўлган.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.