Лос-Анжелесда «Оскар» мукофотига номзодларнинг барчаси эълон қилинди. Номинацияларда энг кўп «Ла-Ла Лэнд» (La La Land) фильми кўрсатилган — у бир вақтнинг ўзида 13 та ҳайкалчага, хусусан, энг яхши фильм номига ҳам даъвогарлик қилмоқда.
«Ла-ла Лэнд» жами 14 марта мукофотга даъвогар сифатида кўрсатилган, бироқ фақат 13 та ҳайкалчани қўлга киритиши мумкин — «Энг яхши қўшиқ» йўналишида мазкур фильмдан бирданига иккита қўшиқ кўрсатилган.
«Ла-Ла Лэнд»дан ташқари, «Энг яхши фильм» йўналишида «Оскар»га қуйидаги фильмлар даъвогар: «Ташриф» (Arrival), «Тўсиқлар» (Fences), «Виждон нуқтаи назаридан» (Hacksaw Ridge), «Исталган йўл билан» (Hell or High Water), «Шер» (Lion), «Ой шуъласи» (Moonlight), «Денгиз бўйидаги Манчестер» (Manchester by the Sea) ва «Яширин шакллар» (Hidden Figures).
«Ла-Ла Лэнд» режиссёри Дэмьен Шазелл ва ундаги бош рол ижрочилари — Райан Гослинг ва Эмма Стоун ҳам ўз йўналишларида «Оскар»га даъвогарлик қилмоқда.
«Энг яхши актриса» йўналишида «Оскар»га, шунингдек, қуйидагилар номзод бўлиб турибди: Изабель Юппер («У» (Elle)), Рут Негга («Лавинг» (Loving)), Натали Портман («Жеки» (Jackie)) ва Мэрил Стрип («Флоренс Фостер Женкинс» (Florence Foster Jenkins)).
«Ла-Ла Лэнд», жумладан, оригинал сценарийси учун ҳам «Оскар»га даъвогарлик қилмоқда. Мазкур йўналишда унда «Денгиз бўйидаги Манчестер», «Лобстер» (The Lobster), «Исталган йўл билан» ва «ХХ аср аёллари» (20th Century Women) рақобат кўрсатади.
Режиссёрлик иши учун аталган совринга, Шазеллдан ташқари, Дени Вильнев («Ташриф»), Мэл Гибсон («Виждон нуқтаи назаридан»), Кеннет Лонерган («Денгиз бўйидаги Манчестер») ва Барри Женкинс («Ой шуъласи») даъвогар бўлиб турибди.
«Энг яхши актёр» йўналишида Райан Гослинг билан бирга Кейси Аффлек («Денгиз бўйидаги Манчестер»), Эндрю Гарфилд («Виждон нуқтаи назаридан»), Вигго Мортенсен («Капитан Фантастик» (Captain Fantastic)) ва Дензел Вашингтон («Тўсиқлар») «Оскар» учун кураш олиб боради.
«Оскар» мукофотига даъвогарларнинг тўлиқ рўйхати билан бу ерда танишиш мумкин. Америка киноакадемияси мукофотларини топшириш маросими 26 февраль куни бўлиб ўтади.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)