Американинг Faraday Future компанияси 4 январь куни ўзининг янги электрокари — ҳайдовчисиз бошқарилувчи функцияларга эга FF91 йўлтанламаси тақдимотини ўтказди, деб ёзади TJournal.
Бироқ тақдимот вақтида саҳнадаги машина номаълум сабабларга кўра мустақил парковка қилиш каби буйруқни бажармади.
Tesla‘нинг рақобатчиси бўлиши кутилаётган автомобиль Лас-Вегасдаги кўргазмалар залида тадбир бошлангандан тахминан бир соат ўтиб пайдо бўлди. Уни смартфонлар ишлаб чиқарувчи LeEco компанияси директорлар кенгаши раиси Цзя Юэтин ҳайдаб келди. У Faraday Future’нинг асосий инвесторларидан биридир.
Юэтин машинадан тушганда Faraday Future’нинг ишланмалар бўйича вице-президенти Ник Сэмпсон унга автомобилнинг автоматик парковка функциясидан фойдаланишни таклиф қилди. Инвестор машина эшигидаги тугмани босди, бироқ ҳеч нарса юз бермади.
Бир неча сониялик жимликдан сўнг Сэмпсон «Бугун у эринчоқлик қилаётган кўринади» деди. Кейинроқ, Юэтиннинг нутқидан сўнг, Сэмпсон машинанинг ҳайдовчисиз бошқариладиган функциясини яна фаоллаштиришга уриниб кўрди. Бунинг учун залдаги чироқларни ҳам пасайтиришди, бироқ FF91 буйруқни яна бажармади.
Тақдимотдан сўнг Сэмпсон муаммо зал томи билан боғлиқлигини маълум қилди. Унинг сўзларига қараганда, томнинг мураккаб тузилиши ҳайдовчисиз бошқариш функцияси ишлаши учун зарур бўлган сигнални ўзига ютган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)