Тошкент манзаралари: Қасддан қарама-қарши қатнов қисмига чиқиб, кўнгилхушлик қилган ҳайдовчи

Янги йил оқшомида Тошкент кўчаларидан бирида йўл ҳаракати қоидаларини қўпол равишда бузган ҳайдовчининг Facebook’даги «Водители Ташкента (Drivers.uz)» гуруҳида эълон қилинган видеоси фаол муҳокамалар ва кескин танқидларга сабаб бўлди.

Видеода ҳайдовчи Шота Руставели кўчасининг Grand Mir меҳмонхонаси ва Геология музейи оралиғидаги бўлагида йўлнинг қарама-қарши қатнов қисмига чиққани, йўл ҳаракати қоидаларини қўпол равишда бузгани ва ҳаракатнинг бошқа иштирокчилари ҳаракатига жиддий халал бергани акс этган.

Видео ҳайдовчининг ёнида бўлган йўловчилардан бири томонидан олинган. У автомобилни жазавага тушган ҳолда, бақириб-бақириб ҳайдаган. Видео давомида йўловчилар ҳайдовчини тартибга чақиришга урингани, уларнинг: «Бўлди қил энди», деган гапларини ҳам эшитиш мумкин.

Ҳайдовчининг шахси, автомобиль русуми ҳақида аниқ маълумотлар йўқ. Фойдаланувчиларнинг ёзишича, қоидабузар оқ рангли Spark’ни бошқараётган бўлган.

«Водители Ташкента» гуруҳи аъзолари ҳайдовчини кескин танқид остига олган, баъзилар ундан очиқчасига ғазабланган («Йўлидан бирор ‘Камаз’ чиқиб, шунга урилганида, ҳеч ҳам хафа бўлмасдим», қабилидаги фикрлар кўплаб билдирилган).

Видеони эълон қилган фойдаланувчи унга шундай таъриф берган: «Тўқликка шўхлик... Изоҳ ўзингиздан».

Маълумот учун, Маъмурий жавобгарлик тўғрисидаги кодекснинг 128-5-моддаси ва 2-қисмига кўра, ҳайдовчиларнинг йўлнинг қарама-қарши ҳаракатланиш учун мўлжалланган томонига ёки бўлагига йўл ҳаракати қоидаларини бузган ҳолда чиқиши, худди шунингдек авария ҳолати юзага келишига сабаб бўлган, яъни йўл ҳаракатининг бошқа қатнашчиларини тезликни, ҳаракат йўналишини кескин ўзгартиришга ёки ўз хавфсизлигини ёҳуд бошқа фуқароларнинг хавфсизлигини таъминлаш учун ўзга чораларни кўришга мажбур қилувчи ҳуқуқбузарликни содир этиши энг кам иш ҳақининг ўн баравари (5 январь ҳолатига кўра — 1 497 750 сўм) миқдорида жарима солинишига сабаб бўлади.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.